У лістападзе ГА «Ахова птушак Бацькаўшчыны» рэалізавала ініцыятыву «Захавальнікі Выганашчанскіх балот» (праект ЕС/ПРААН «Устойлівае развіццё на мясцовым узроўні»), мэтай якой было стварэнне руху захавальнікаў у Выганашчанскім рэгіёне. Нягледзячы на кароткі тэрмін выканання, ініцыятыва была насычана мерапрыемствамі і мела канкрэтныя вынікі.

Каб знайсці захавальнікаў з ліку жыхароў рэгіёна, былі праведзены сустрэчы ў населеных пунктах: Выганашчы, Целеханы, Рэчкі, Вялікая Гаць, Амельная. Сустрэчы выклікалі цікавасць у амаль 200 чалавек, сярод іх было шмат вучняў, якія змогуць падзяліцца набытымі ведамі з бацькамі і сябрамі. Галоўнай мэтай сустрэч было паказаць вядомы ўдзельнікам край з незнаёмага боку – з боку каштоўнасці Выганашчанскіх балот для біяразнастайнасці. Супрацоўнікі АПБ падрабязна распавялі пра праграму «Тэрыторыі, важныя для птушак (ТВП) у Беларусі» і праект «Захавальнікі Выганашчанскіх балот», значнасць рэгіёна для захавання папуляцый рэдкіх птушак.

Асаблівы рэзананс мела інфармацыя пра адказнаць за браканьерства ў дачыненні да любога віда драпежных птушак, што паведаў Дзяніс Кіцель. Так, згодна ўказу Прэзідэнта РБ № 580 ад 08.12.2005 і палажэнню канвенцыі CITES, штраф за здабычу звычайнага віда драпежнай птушкі, напрыклад, канюка, складае 2 100 000 рублёў, а за здабыццё занесенага ў Чырвоную кнігу віда, напрыклад, барадатай кугакаўкі, – 3 150 000 рублёў. Знішчэнне гнязда чорнага бусла з 4 яйкамі ці птушанятамі абыдзецца злачынцам амаль у 6 млн рублёў! Супрацоўнікі заказніка «Выганашчанскі» Нікалай Варабей і Аляксандр Іваноў пазнаёмілі з дзейнасцю заказніка і мерамі па яго ахове.

Для тых, хто захацеў стаць захавальнікамі Выганашчанскіх балот, быў арганізаваны трэнінг, куды былі запрошаны эксперты па экалагічнаму заканадаўству Грыгорый Фёдараў і міжнароднай лясной сертыфікацыі FSC Георгій Казулька. Супрацоўнікі АПБ паказалі дзейнасць захавальнікаў іншых ТВП Беларусі і разам з удзельнікамі абмеркавалі існуючыя ў рэгіёне пагрозы і праблемы ТВП «Выганашчанскія балоты». Захавальнікі атрымалі камплект матэрыялаў АПБ, карысны ў будучай дзейнасці.

Самым цікавым мерапрыемствам, безумоўна, стаў семінар-трэнінг па лазапляценню і вырабу штучных гнездавых скрынь для драпежных птушак. Пры дапамозе запрошанага майстра прысутныя змаглі засвоіць методыку пляцення з лазы і паспрабаваць зрабіць штучнае гняздоўе ў выглядзе каша для розных відаў соў. У плеценых кашах змогуць гнездавацца барадатыя кугакаўкі і вушастыя совы, якія не ўмеюць самі рабіць гнёзды. Незвычайныя з выгляду «кватэры» лёгка падняць на дрэва, а дзякуючы пляцёнцы, яны падобныя на сапраўдныя гнёзды. Таксама ў іх не будзе застойвацца вада.
Галінка за галінкай – і новая «кватэра» для барадатай кугакаўкі будзе гатова.

Удзельнікі з в. Вулькі-Целеханскай спрабуюць зрабіць свой кошык для барадатай кугакаўкі.

Фёдар Сауцін і ўдзельнікі з в. Рэчкі дэманструюць гнездавую скрыню для сыча-сіпеля.

Пакуль адны ўдзельнікі вучыліся рабіць гнездавыя кашы, іншыя засвойвалі навыкі будаўнікоў гнездавых скрынь для птушак, якія гняздуюцца ў дуплах. Кожны змог выбраць тып і зрабіць домік для сыча-сіпеля ці касматаногага сыча, гогаля, сокала-пустальгі. Вынікі працоўнага дня аказаліся плённымі: было выраблена 20 штучных гнёздаў і кашоў, асаблівую стараннасць праявілі вучні Рэчаўскай і Вулька-Целеханскай школы пад кіраўніцтвам настаўнікаў Фёдара Сауціна і Аляксандра Мяліка.
Вынік семінара-трэнінга – 20 штучных гнёзд.

Вынік семінара-трэнінга – 20 штучных гнёзд.

Дзяніс Кіцель усталёўвае скрыню для сыча-сіпеля.
Вырабленыя падчас семінара штучныя гнёзды былі развешаны супрацоўнікамі АПБ і заказніка. Будзем чакаць улазінаў разам!

Вольга Лукшыц , каардынатар праекта «Захавальнікі Выганашчанскіх балот», супрацоўнік АПБ.

---

Свае каментарыі можаце пакідаць ў нашым ЖЖ !

Таксама глядзіце

Охраняемая площадь ТВП Простырь увеличилась

Два года на страже ТВП Болото Званец

ТВП «Ореховское» получила статус ООПТ

Каким будет завтрашний день «Выгонощанских разливов»?

Итоги волонтерских лагерей природоохранного проекта «Спасем Ельню вместе!»-2011

Сколько коростелей обитает на Средней Припяти?

Браславские озера могут получить статус территории, важной для птиц

Полесские зарисовки одного семинара

Новое место обитания вертлявой камышевки обнаружено недалеко от Минска

Открылась фотовыставка "В царстве выгонощанского орлана"